ابو سيفين ديما بيقف معايا وانا ديما اقوله انت سندى وضهرى وهو شفيعى وغالى عليا وبحبه من كل قلبى

 + من رسائل الصفحة +

 

 

 

ابو سيفين ديما بيقف معايا وانا ديما اقوله انت سندى وضهرى وهو شفيعى وغالى عليا وبحبه من كل قلبى

الى حصل ان بنتى من شهرين تعبت وجالها نزله معويه شديده جدا وبنتى دى ليها ظروف صحيه مولوده بيها اصلا
هى مولوده بمرض نادر وانا كنت كتبت قبل كده قد ايه ربنا حنين وسندنا فى تقبل التجربه وكنا بنحس بأيد ربنا ديما معانا
لما جالها من شهرين النزله المعويه الدكاتره عالجوها على اساس نزله معويه بمضاد حيوى وحقن للترجيع وادويه اسهال لكن مفيش اى تحسن واستمر التعب اسبوعين قالولى دى عدوى فيروسيه وادوها مضاد فيروسات وقالولى دى اشتباه كرونا وقالولى اخواتها ميتعاملوش معاها بس انا مكنتش مقتنعه لان انا بتعامل معاها ومتعبتش بالاضافه لانها قعيده مش بتمشى ولا بتروح فى حته فأذاى هتكون اتعدت
اخدت ادويه كتير والحراره كات عاليه علطول مش بتنزل وكانت بتوصل ل ٤٢ وكانت عياط مستمر لحد محصل فى جسمها طفح جلدى ذى الحمونيل
جريت على دكتور الاطفال تانى قالى هى هتبتدى تخف الفيرس نطر عل جسمها وكتبلها حقنه كورتيزون وحقنه للحراره اخدتهم وصحيت تانى يوم ذى الفل مفيش طفح فى الجلد ولا حراره قعدت يوم كويسه وتانى يوم الطفح ده رجع اسواء مما كان والحراره ٤٢ ونص
وكمادات وادويه والحراره مبتنزلش عملتلها تحاليل كتير مفيش اى حاجه تدل انها عندها حاجه حتى التيفود معندهاش جريت تانى عند دكتور الاطفال قالى ده حزام نارى وادانا كورس تانى مضاد فيروسات خلصناه ومفيش اى تحسن كده بقينا الاسبوع التالت والبت لسه تعبانه جريت على دكتور بطنه وقلب اطفال طلب منى حبه تحاليل عملتهالها وقالى انا شاكك فى مرض اسمه كواساكى
فقلتله نعم قالى ده مرض نادر قلتله بعنى هى مولوده بمرض نادر ودلوقتى يجلها مرض نادر هو انا موعوده بالنوادر قالى الله يكون فى العون قلتله طب علاجه ايه
قالى لازم تتحجز فى مستشفى ونحقنها بأجسام مضاده لان ده مرض مناعى الجهاز المناعى بيفرز اجسام مضاده تهاجم نفسه
هديها مضاد حيوى لمده ٤٨ ساعه استقرت حالتها خير وبركه مستقرتش لازم احجزها فى مستشفى
طبعا الحاله مستقرتش ودخلنا المستشفى وفى خلال الوقت ده البت كان جسمها ورم اوى وكله بقى ملتهب ذى المحروق
والجلد بيقع مش بيقشر الجلد السميك بيطلع من جسمها وجروح كتير فى كل جسمها وشكلها اختلف ومبقتش فاهمه هو ايه الى بيحصل اصلا
لما متحسنتش اتحجزنا ليله فى مستشفى كنانه بطنطا عشان يركبولها محاليل لان جسمها اصبح ضعيف جدا ولان الجروح كانت فى كل جسمها مكنتش بتاكل خالص قريت عن الكواساكى ده لقيته مرض صعب جدا بيعمل التهابات فى كل الاوعيه الدمويه ال فى الجسم وبيعمل التهاب فى الشرايين التاجيه وفى عضله القلب وبيعمل جلطات كنت مرعوبه انها يجرالها حاجه قعدت انده طبعا على ابو سيفين واقوله بقى كده سايبها هى غلبانه وتعبانه طب لو انا مش فارقه معاك بنتى مش فارقه معاك تسيبها كده
المهم جاتلنا دكتوره امراض دم ومناعه واجمعت مع دكتور اسامه عبد الرسول دكتور باطنه وقلب وهو الى عرف تشخيص بنتى اجمعت ان ده كواساكى وقالت احنا بنقول ان ده المرض بثلاث اعراض ليه هى عندها ٦ اعراض من المرض . ده اكيد كواساكى
طيب ايه علاجه قالت لنا علاجه غالى شويه قلنلها مش مهم كنا فاكرين الفين تلاته
قالت لنا هى وزنها ٢٠ كيلو هتاخد ٤٠ جرام من iv ig الى هى الاجسام المضاده دى الزجاجه الواحده ٥ مل جرام وده دوا مش متوفر لانه مستورد ومع كورونا الاستيراد وقف يأما تجيبوه من مصل ولقاح القاهره والزجاجه الواحده ب ٥ الاف جنيه يأما تجيبوه من الصيدليات الكبيره بس بيبيعوا الزجاجه الواحده ب ٨ او ٩ الاف يعنى لو من المصل واللقاح التكلفه هتكون ٤٠ الف جنيه
طبعا بالنسبه لينا مبلغ كبير فقلنالها طيب نجيب نص الجرعه دلوقت قالتلنا هتحقنوا النهارده لازم فى خلال خمس ايام تحقنوا الباقى ولو اتأخرتوا كأنها مأخدتش حاجه وكمان الدكتور كان خايف المرض يوصل للقلب
بقينا حيرانين مش عارفين ناخد قرار نعمل ايه نتصرف اذاى
لقنا الدكتوره بتقولنا ممكن كمان تجروا فى اجراءات تأمين صحى
احنا عمرنا ماعملنا كده قبل كده فجوزى سأل واحد صاحبه

كنا محجوزين فى مستشفى فى طنطا لانى كنت فى زياره عند اهلى وانا متجوزه فى المنصوره فجوزى اتصل بواحد صاحبه شغال فى التأمين الصحى محاسب فى المنصوره وقاله الحال فقاله هسألك الدكاتره بكره والكلام ده كان يوم سبت ودكتور امراض الدم والمناعه مش بيجى غير حد واربع احنا على مخرجنا من المستشفى الى فى طنطا الحد الصبح ملحقناش نروح لدكتور التأمين يوم الحد واليوم ممكن يفرق معانا انه يعرض بنتى للخطر
وكمان صاحب جوزى قلنا اجراءات التأمين ممكن تاخد من اسبوع لعشر ايام عشان نصرف لها الدوا لان هيحددولها ميعاد لجنه ثلاثيه فى القاهره لان الدوا بتاعها تكلفته غاليه ولازم يتأكدوا انها تستحق الدوا ده
احنا كانت نفسيتنا وحشه جدا والبنت بتتألم وكل جسمها التهابات وجروح
فجوزى قالى لو يوم الاربع معرفناش نصرف الدوا وده كان من رابع المستحيلات اننا نصرفه فى نفس اليوم فقالى خلاص نجيبه احنا وطبعا المبلغ كبير جدا
فقعدت انده على ابو سيفين وقعد اقوله انا زعلانه منك انت اذاى سايبنى طب لو انا هنت عليك بنتى الغلبانه دى كمان هانت عليك وقلتله انا اى حد هيجيب سيرتك قدامى هقولهم ابو سيفين جدع وشهم وحلو وكل حاجه بس دى هتكون اخر مره اندهلك او انطق اسمك على لسانى انت اذاى سايبنى كده
كنت حزينه جدا ومن عشمى فيه قلتله كده وكنت فاقده الامل ان يوم الاربع يجى بسلام
جه يوم الاربع ورحنا لدكتور التأمين الى قال انا شاكك ان ده مش كواساكى اصلا
فجوزى قاله انا مش فارق معايا ده كواساكى ولا بلا ازرق قولى التشخيص ايه والعلاج انا عاوز بنتى تخف وكان منفعل جدا لان البنت مكنتش طايقه اننا نشيلها وكل جسمها واجعها
انا طول الوقت وانا عماله اقول لابوسيفين لو مدخلتش مش هنده عليك تانى انا صعبان عليا منك بقى كده يابو سيفين
ولدرجه انده على كل القديسين ويجى اسمه على لسانى اقوله لا مش هقول اسمك انت سايبنى
المهم فوجئنا الدكتور بيكتب بعد الكشف تحجز فى المستشفى على ذمه صرف الدواء فقلناله يعنى ايه
قلنا هتتحجز فى المستشفى لو الدوا موجود فى المحافظه هيتصرف لها لو مش موجود تفضل محجوزه لحد مايجى من مصر
المهم رحنا المستشفى وانا مش عامله حسابى على حاجه ولا لبس ولا اكل ولا اى حاجه وفضلنا نخلص اجراءات دخول اكتر من ساعتين جوزى بيجرى يخلص ورق وانا واقفه فى الطوارىء شايله البنت خمس سنين ونص يعنى وزنها تقيل صعب عليا نفسي جدا وخاصه لما عرفت ان المستشفى دى فيها عزل لان واحنا واقفين سمعنا فى ميكرفون نرجو اخلاء الممر لدخول حالتين كرونا وصعب عليا نفسي اكتر لما صاحب جوزى قالى انا اسف انتى هتباتى فى عنبر الاطفال لوحدك مع البنت لان العنبر كله امهات وجوزك مينفعش يكون معاكى
بنتى مولوده مش بتشوف ومش بتسمع يعنى انا لوحدى مقدرش اتحكم فيها ولو لقينا الدوا لازم اركب الكانيولا فى رجليها وافضل ماسكه رجلها عشان متتخلعش ولازم حد يكون معايا عشان وقت الغيار او كده طب ده هيحصل اذاى وجوزى مش معايا وكمان خفت اقعد مع اطفال مريضه هى جهازها المناعى خربان اذاى اقعدها مع اطفال عندهم امراض ممكن يتنقل لها مرض منهم
بقيت من جوايا اتخانق مع ابو سيفين وافوله عاجبك البهدله دى يرضيك كده لو يرضيك ياسيدى خلاص بس انا مش هندهلك تانى خالص
المهم صاحب جوزى شفنى وانا بعيط فقالى طيب انا عارف دكتوره هنا هكلمها وافهمها الوضع يمكن تساعدنا المهم كلمها وهى شغاله فى قسم الباطنه والقلب كبار فقالت هستأذن المدير واشرحله الوضع
المهم المدير وافق اننا نقعد فى اوضه خاصه فى دور الباطنه والقلب
ودخلنا الاوضه نضيفه وفيها كل الامكانيات لما كان بيجلنا ممرضات كانوا يقولوللنا انتم اذاى قاعدين هنا انتم المفروض فى قسم الاطفال انتم اكيد ليكم واسطه ده مدير القسم هنا صعب ومش بيسمح بالكلام ده لحد
كان وقت تغير شفت ومكنش الصيدلى لسه جه قعدنا اربع ساعات فى الاوضه مش عارفين الدوا موجود ولا لا والانتظار سخيف والوقت بيمر ببطأ
جه الصيدلى والمفاجأه لقينا الدوا الكميه المطلوبه وصرفلنا الدوا والبنت بدأت الحقن بالفعل
شكرت ابو سيفين من كل قلبى ان ربنا سهل امورنا وعرفنا ناخد الدوا
وعشان ربنا يظهر يده وتدخله جات رئيسه التمريض فى اول ليله ومعاها الدوسيه بتاع بنتى وسألتنى هو انتم عملتوا لجنه ثلاثيه فى مصر قلتلها لا قالتلى اذاى
قلتلها معرفش
قالتلى اتصرف ليكم الدوا اذاى
قلتلها ليه ايه المشكله
قالتلى دى مسؤليه على الصيدلى اذاى يصرف الدوا منغير مايبص على الدوسيه بتاع الحاله ويتأكد ان فيه تقرير لجنه ثلاثيه انا هقول للمدير عشان اخلى مسؤليتى
انا زعلت انا وجوزى وقلنا لو انت الى ادخلت يأبو سيفين فى صرف الدوا متخليش الصيدلى ده يتجازى بسببنا
بالصدفه يدخل دكتور جوزى يطلع يعرفه من زمان من ايام الكليه لان جوزى دكتور بيطرى وكانوا اصحاب فقاله على موضوع اللجنه الثلاثيه ده
فالدكتور صاحب جوزى ده قاله بس كده بسيطه انا هعملها ورقه اللجنه الثلاثيه ونص ساعه ولقيناه جايبهالنا
انا من كتر مانا مش مصدقه صورت الورقه دى
وودتها للممرضه فقالتلى كده تمام كده الدوسيه كامل قلتلها الصيدلى مش هيتأذى قالتلى لا خلاص كده
وكانت ايد ربنا معانا وعملت تمجيد لابو سيفين حبيبي سندى وضهرى الشهم الجدع الحنين
اكسيوس اكسيوس اكسيوس فيلوباتير مرقوريوس

*وده تقرير اللجنه الثلاثيه لان انا مكنتش مصدقه تدخل ربنا السريع ده بشفاعه ابو سيفين الغالى